Almaty qalasynyń ákimi B. Saǵyntaev «Astana» Halyqaralyq qarjy ortalyǵy uıymdastyrǵan qarjy forýmyna qatysty. Qala basshysy megapolısti damytýǵa ınvestısıa tartýdyń negizgi baǵyttary týraly aıtty, dep jazady ákimdiktiń baspasóz qyzmeti.

Baqytjan Saǵyntaev óziniń quttyqtaý sózinde Almatyda Qazaqstannyń salyq tóleıtin iri kompanıalarynyń úshten biriniń, 30-dan astam transulttyq kompanıalardyń, bankterdiń bas ofısteriniń 86%-nyń, birikken kásiporyndar men iri halyqaralyq uıymdardyń 43%-nyń ornalasqanyn atap ótti. Almaty – ekonomıkasy 36 mıllıard dollardy quraıtyn Orta Azıadaǵy eń damyǵan megapolıs.

«Biz aldymyzǵa jahandyq qala bolýdyń jáne ómir súrý sapasy ári ekonomıkalyq múmkindikteri jaǵynan 100 megapolıster qataryna ený boıynsha uzaq merzimdi mindetti qoıýdamyz. Almaty – halqy qala mańyndaǵylardy qosa eseptegende qazirdiń ózinde úsh mıllıonǵa jaqyndap qaldy, al 2030 jylǵa qaraı bes mıllıonǵa jetýi múmkin», – dedi B.Saǵyntaev.

Ol shet aımaqtardy qala standarttaryna saı damytý jónindegi «Jańa Almaty» atty úsh jyldyq jospardy júzege asyrý úshin 800 mlrd. teńgege jýyq búdjet qarjysy men jeke ınvestısıa qajet ekenin, sol arqyly qala bastamalarynyń oryndalýyn jáne almatylyqtardyń turmys jaǵdaılaryn jasqartýdy qamtamasyz etetin salyq túsimin arttyrýǵa bolatynyn aıtty.

Budan ózge, Almaty ákimdigi «Astana» Halyqaralyq qarjy ortalyǵynda qyzmetin júrgizetin ınvestısıalyq qormen yntymaqtastyqty qalyptastyrýdy josparlaýda. B.Saǵyntaev úkimetpen birge bıznes júrgizýde ákimshilik kedergilerdi azaıtý, tirkeý prosedýralaryn jeńildetý boıynsha sharalar paketiniń qolǵa alynǵanyn atap ótti.

«Almatyda membúdjet esebinen Indýstrıaldy aımaqta biregeı ınfraqurylym qalyptasty. Sonymen qatar «Inovasıalyq tehnologıalar parki» AEA salyq tóleý jáne basqalary boıynsha jeńildikter qarastyrylǵan», – dedi qala ákimi.

Aıta keterligi, megapolıste bıznesti qoldaýdyń birqatar konsaltıńtik jáne qarjylyq sharalary júzege asýda. Mysaly, Qoldaý kásipkerlikti qoldaý ortalyǵy bızneske bir tereze qaǵıdasy boıynsha memqyzmetter jáne tegin konsaltıńtik qyzmetter kórsetedi. «Almaty Finance» kompanıasy men «Almaty» mıkroqarjylyq uıym shaǵyn jáne orta bıznesti qoldaý úshin 2%-dan 7%-ǵa deıin jeńildetilgen nesıeler beredi.

«Jalpy biz keler jyldan bastap SHOB qarjylyq qoldaý kólemin úsh ese ulǵaıtýdy josparlaýdamyz. Aǵymdaǵy jyly 11,5 mıllıard teńgeden 30 mıllıard teńgege deıin kóbeıtemiz. Odan ári biz sheshim qabyldaý úshin saraptama bazasyna súıene otyryp, onyń ishinde ákimdiktiń sıtýasıalyq ortalyǵy jáne Big Data negizinde qoldaý sharalaryna túzetý engizetin bolamyz», – dep atap ótti megapolıs basshysy.

Ol óziniń sózinde áleýetti ınvestorlar úshin taýarlardy óńdeý jáne qaıta óńdeý, kólik-logıstıka qyzmeti, týrızm salalarynyń perspektıvaly baǵyttary ekenin atap ótti. Osynaý ómirsheń salalarda jańa óndiris ashýǵa zor yqpal etetin kreatıvti ekonomıkaǵa erekshe nazar aýdarǵan jón.

Qazaqstandyq qarjy forýmy – tutynýshylar quqyǵyn qorǵaý, AHQO-nyń bıznes úshin múmkindikter máselelerin talqylaıtyn alań. Forýmnyń maqsaty – AHQO-da júrgiziletin ınvestısıa tartýdyń negizderi jáne bıznes júrgizýdiń sharttary týraly habardar etý, sonymen qatar qarjy qyzmetinde tutynýshylardy qorǵaý. Alqaly sharada AHQO sarapshylary spıker retinde qarjy qyzmetin, qarjy tehnologıasyn, jasyl jáne ıslam oblıgasıasyn shyǵarýdy retteý, baǵaly qaǵazdar naryǵyn ınvestısıalaý, sonymen qatar úzdiksiz kásibı damý týraly tereń maǵlumat ala aldy.